Wenn scho d Leerere immer gsäit het, häigsch e groossi Schnuure.
3 Dääg unterwäggs und d Mamme bliibt dehäim!
Wotsch au? Denn kumm zu uns:
Mir sueche Männer ab 6 Joor, wo mit uns wänn Fasnacht mache.
#jointhedupf – d’Männerclique plus
Wilkumme bim Dupf-Club Basel!
Mir, dr Dupf-Club Basel sin e Basler Fasnachtsclique, wo im Joor 1932 gründet worde isch. Bi uns gits e Jungi Garde, e Stammverein und e Alti Garde. Mir wirke am Drummeli mit, laufe am Cortège mit und hän s Joor duure divärsi Vereinsaläss.
Mir hän e ordentligs Repertoire, aber es stoht bi uns nid numme s Musikalische im Vordergrund. Me kennt dr Dupf-Club für ussgfalleni Drummeli-Byyträg und e fixe Agändapunkt an dr Fasnacht: dr Pierrot-Oobe am Fasnachtszischtig, wo die ganzi Clique im glyche Goschdym e Umgang het.
Mir mache unseri Larve sälber und sin au sunscht aktiv s Joor duure. Kameradschaft wird bi uns gross gschriibe!
Bi uns ka me bi dr Junge Garde, em Stamm und dr Alte Garde mitmache binere Schnupperfasnacht. Mäld di doch bi Interässe unter däm Link.
wytter unde kasch alli Zeedel 2024 vom ganze Dupf-Club lääse und loose, vorglääse vo de Zeedeldichter perseenlig!
Stammverein
Dr Zeedel Fasnacht 2024 vom Stammverein
Dr Dupf-Club Basel isch e funkzionierendi Männer- Stammclique sytt 1932. Mer hänn s nätt zämme und sinn frey vo Cliquespaltige blyybe. Kameradschaft isch für dr Dupf-Club enorm wichtig!
Jungi Garde
Dr Zeedel Fasnacht 2024 vo dr Junge Garde
Scho im Joor 1936 isch die Jungi Garde gründet worde, und sitthäär sinn viil Junggardischte denn in Stammverein ko.
Alti Garde
Dr Zeedel Fasnacht 2024 vo dr Alte Garde
Sytt 1972 könne die ältere Heere ab-em 40schte Altersjoor in die Alti Garde übereträtte, oder aber au diräggt vo-n-ere andere Clique zue uns ko. Bi de «Alte» goht’s e weeneli gmietliger zue, wie’s muess syy.
Clique-Käller
Im Pfäffergässli 8 unterhalte-mer e schöne Cliquekäller, wo unter dr Wuche vo dr Clique sälber benützt wird. Dört finde unseri Drummel- und Pfyfferstunde statt und unseri Sitzige.
Und an de Samschtige und Sunntige ka-me dä Käller au privat miete!