logo

Zeedel Alti Garde 2016

 

Dupf-Club Basel Alti Garde

Fasnacht 2016

Dr Bättelstaat am Bättelstaab

Dr Lauber waiss, geteilt durch zwai
gitt d Hälfti am Fuudi und d Hälfti am Bai.
Nimmsch jetz no d Meerwärtstyyr drzue,
denn lauft die Subbe grad in d Schueh.
Jetz rächnisch s Resultat mool zwai,
well schliesslig hesch jo au zwai Bai.
Scho hesch di Budget, s stimmt esoo!
Und Basel isch jo au no doo!So macht me s Budget z Baselland,
e mängge maint s sig allerhand.
Well aber kaine rächne kaa
feen d Schwiirigkaite erscht graad aa.
Me sott jo au in d Zuekumft luege
sunscht laufe d Keschte us de Fuege.
Und das het vyyl mit Dängge z due!
Do fääle denn halt d Kepf drzue.

Au Kinder macht me z Lieschtel schnäll
Die sin denn bletzlig doo – und gäll
die mien au Schuele haa und Lyt!
Und fir das alles hesch kai Zyt.
Muesch im‘ne Schuelhuus d Haizig fligge,
darfsch d Schieler nit in d Ferie schigge.
Die haize denn mit vierzig Graad
Fieber au no s Hallebad.

D Frau Gschwind zeigt ihri grosse Zeen,
aber au s Tschyyyys macht die nit scheen.
Si isch jetz Chefin vo Kulture!
Was isch denn daas, frooge sich d Buure.
Und d Bildig gheert au doo drzue.
Das kenn i au nit, muuht e Kue.
Woo halt nyt isch, dert spaarsch au nyt,
s git heggschtens s greesser Deefizyt.

Dr Pegoraro isch das glyych!
Bi iire wärde d Buure ryych.
Wenn ain sy Land verkaufe kaa,
denn leggt si s Gäld in Strosse aa.
Si schwätzt und schwätzt und wird nit root,
Si demonstriert grad wie das goot.
Bi dere Ryystrooss wirds grad glaar,
das Deefizyt waggst wunderbaar.

E Gnopf, dä kaa sich jede laischte.
Gheert s Glaid drzue, wie bi de maischte,
denn muesch die Keschte ney studiere,
e Koschterächnig duurefiere.
Jetz koschte d Uniforme ney,
– und wääge däm gits au kei Gschrey –
zwanzig Mool mee – es macht jo nyt,
das het no Blatz im Deefizyt.

D‘ Basler spände zig Millione!
Doo kennt sich doch s Studiere loone,
was me mit deene Stitz kennt mache,
es gääbt doch sicher e baar Sache.
Aber die Buure tigge gspunne.
und d SVP die sait au numme:
mir wei nüm luege, nüt beweege,
es blybt drbyy, mir syy drgeege!

Und wenn me d Tunnel z’Nacht saniert,
denn waisch jo woo das aanefiert.
Dr Stau am Daag isch programmiert
und drotzdäm hänn si s duuregstiert
und neyi Strosse hän si baut.
Joo, s Budget isch jo scho versaut!
Sin Zaale root, das waiss dr Root,
denn ryymt sichs au uff dunggelrot.

E soone Budget, das goot numme,
mit so Regierigsreet, so dumme!
Die sin bim Rächne duuregheit,
uff jede Fall sin die nit gscheit!
Drum tschyyyse si jetz, wie nit bleed
halt wie si z Liestel sin, die Reet
und finde s Budget toll esoo,
uff alli Fäll sait jeede joo.

Es isch scho soo, au z Muttenz unde
hän si das Joghurt nit erfunde!
Ass aber “Basel“ druffstoo duet,
macht d Buure muff – me heert si guet!
Zem Gligg kaa Nestlé denn ganz schnäll
das “Basel“ uusenee und gäll
e Hilfteschanz soll nimm entstoo,
mir Stedter wäre au ganz froo.

In s ney Asyylhaim z Lieschtel oobe
doo kemme jetz ney alles Schwoobe.
Well s gaischtig Erbguet uff em Land
isch druurig dief, das isch bikannt.
Jetz hän si miesse akzeptiere,
ass si mien Schwoobe importiere
und d Chromosoome “dumm und buur“
ersetze mien mit “bruun und stuur“.

Millione göie doo bachab!
Jo, sogar s Münz wird langsam knabb!
Soo hööchi Zaale kennt kai Sau
im Baselbiet – woohäär denn au?
Jetz brummle sy, und kein weiss wyter!
Das Deefizyt schyynt wäärli schyter!
Mir wei jetz ein wo s Gschäft verstoot!
(Das wird dr allererscht im Root!!)