logo

Zeedel Stamm 2016

 

Dupf-Club Basel 1932 Stammverein

Fasnacht 2016

Patriotischi
Extreemfasnächtler
Geege d
Infiltrierig
Dur
Asyllandschäftler

Dr Männi stoot am Stroosserand
Wäädlet wild mit syner Hand
Uss voller Lunge schreyt är: Schand!
Es goot z Änd – my Oobeland!

An ihm verbyy am Stainebärg
Lauft e Grubbe Gartezwärg
„Ormalinger Lärm-Rabaucke“
Stoot bi aim uff syner Paugge

Ihr bleeden Affe, geend doch haim
Zrugg uff eyri Krisibaim
Brüllt dr Männi, root vor Wuet
Fuurt mit eych, Landschäftlerbruet!

Dr Johan niggt: Es isch doch woor.
Es wird schlimmer, Joor fir Joor
Das Gsindel mues men als wie mee
An der Basler Fasnacht gsee

Kain vo dääne waiss konkreet
Wie unseri Traditioon ussgseet
Wie sy sich z verhalte hän
Wenn sy comme-il-faut syy wänn

Larve, Sujet, Routewaal
Em Rampass isch das grad egaal
Uff all daas sinn die nit erpicht
Moole Schminggi sich ins Gsicht

Dien d Route krytz und queere
Wie wenn das kaine wurdi steere
Sy maine, dass es denn scho länggt
Wenn me Strau an Waage hänggt

Und bloose uss verluuste Bärt
Uff jeedem Blatz e schreegs Konzärt
Blockiere dert grad stundelang
Der Fasnacht iire gwoonte Gang

Au in der Baiz kasch bald nimm hogge
Ooni dass e soone Sogge
Im Rampass-Släng e Bangg vorsingt
Wo nach Buure-Pointe stinggt

Wenn de frindlig und bestimmt
Saisch, wie me sich doo benimmt
Hesch Gligg, wenn sii nur driber lache
Und dir nit no aini bache

Vom Comité, de hooche Heere,
Duet sich doo draa niemer steere
Die dien lieber Zeedel zelle
Als sich em Find entgeege z stelle

Schlimmer no: Statt zämme z stoo
Het me d Dyyren offe gloo
Vo Möhlin kemme Drummelgrubbe
Uss Lieschtel ganzi Pfyffertruppe

E Rassischt, waisch Männi, bini nit
Aber es sin andergattig Lytt
Wo sy uss Gämpe, Ammel, Laufeburg,
Frick, Witterswil und Murg,
Uss Kriens und Visp und Chur
Delémont und Winterthur,
Sarne, Balschtel, Zwinge
Mulhouse und au Läufelfinge
Staine, Weil und Wohle,
zue uns an d Fasnacht hoole.

Sogar Guggen uss Luzärn
Nimmt me hitte z Basel gärn
Dä Fremdesturm isch kuum me z toppe
Kasch au mit Poller ihn nit stoppe

Und will men immer mee dryy zwängt
Wärde d Basler bald verdrängt
Bald! Liebe Johan, isch es z spoot
Und unseri Basler Fasnacht doot!

D Meedie dien das ignoriere
Dien scheeni Määrli generiere
Vo Toleranz und Harmonie
Joo, Männi, s kennt kuum schlimmer syy

Jetzt hänggt s an uns, em Volgg, das z richte
Iiber all die Missständ z brichte
Geege die Oobere z intrigiere
E Revolutioon z lanciere

E Facebook-Gruppe dien mer grinde
So schnäll wie meeglig Frinde finde
Und starte geege d Invasioon
Im Internet e Petizioon

Dert, Johan, fordere mir mit Drugg
Unseri Fasnacht wider zrugg
Wär nit vo doo isch, gheert verbannt
Wider zrugg an Stroosserand

Bis es dr Hinterletscht kapiert
Wird vor em Roothuus demonschtriert
Mir dien Pegida-Faane schwinge
Luttstargg unser Rächt erzwinge

Dass d Fasnacht wider suuber isch Und nit e Multikulti-Gmisch.

Epilog

Vo ihrem Kampf vo de Kultuure
Sinn baidi zimlig uff dr Schnuure
Dr Johan sait em Männi Tschau
Macht sich uff e Wääg zer Frau

Dr Männi schulteret sy Drummle
Duet z fryyde Richtig Bahnhof bummle
Styggt dert ins Taxi yy, wie gwoont
Faart haim uff Ryynach, won är woont.