Die Jungi Garde isch im Johr 1936 as Drummelschuel gründet worde. 13 Tamboure hänn scho an dr Fasnacht druf mitgmacht, mit em verlorene Schlissel vo dr alte Universiteet as Sujet. 1938 isch den au d’Pfyfferschuel drzueko, mit luter Maitli und aim Bueb. Aber an dr Fasnacht 1939 sinn si zum mitmache nonig parad gsi. 1941 isch die Jungi Garde mit 13 Tamboure am Monschtre-Drummel-Konzärt mit dr Drummelschuel ufträtte. E Uffierig, wo übrigens 1951, 1963, 1979 und 1991 au wider stattgfunde hett.
Wäred em Grieg hetts jo kaini Fasnachte gä und s’Inträsse am Fasnacht mache isch gschwunde. Entsprächend schlächt sin die Kürs bsuecht worde, hänn aber immer stattgfunde. Yfrigi Junggardischte, zämme mit em Obmaa Emil Schifferle hänn denn aber Dampf ufgsetzt und 1947 wider s’erscht Mool Fasnacht gmacht. Bis Hitte isch die Ketti nümme unterbroche worde.
D’Ladärne vo 1953 hett me übrigens em Museum für Völkerkunde an dr Auguschtinergass gschänggt und s’usgstopft Goschtym vom Tambourmajor samt Stock isch sythär im ethnografische Museum in London usgstellt.
D’Mitglidschaft isch offe für Buebe. E grosse Wärt lege mir druf, as au d’Eltere mögligscht aktiv mitmache, im Eltereobe sueche mir Kontakt. Buebe könne im Vortrab mitmache, aber au Drummle oder Pfyffe leere. Wär no unsicher isch was er will, ka zerscht emol e Joor ko schnuppere. D’Yebigsstunde finde in unserem Käller im Pfäffergässli 8 statt. S’Repertoir umfasst ebbe 10 Märsch und isch mit däm vom Stammverain abgstimmt. Wichtig isch is, as die Buebe au in d’Ghaimnis vo dr Fasnachtswält ibunde wärde. Alles was mit em Fasnachtsgaischt zämmehängt, solle die Junge mitbiko.
Nadyyrlig isch s’Drummle und Pfyffe d’Hauptsach. Am e äxtra Wucheänd wird Perfektion pfläggt. Am intärne Prysdrummle und -Pfyffe kenne si sich mässe, fir e ryche Goobetisch bestoot e Patronat vo dr Alte Garde. Und wärs scho e glai besser ka, wird au am offizielle Prysdrummle und -Pfyffe mitmache.
Zum Fasnacht mache sotte die Junggardischte meegligscht viel sälber bytrage. S’Sujet für an dr Fasnacht bestimme die Junge sälber und wärde au für d’Realisierig so wyt as meeglig byzoge, speziell bim Larve mache. An dr Fasnacht bilde si e sälbständige Zug, sinn aber am Morgestraich und am Mittwuch zobe zämme mit em Stammverain und dr Alte Garde unterwäggs.
Sälpferständlig wird au d’Kameradschaft pfläggt. Im Summerprogramm ohni Instrumänt gitts verschiideni Aktiviteete.
Im Alter vo 18 Johr erfolgt dr Übertritt in Stammverain. Dä wird sorgfältig vorberaitet, eso as sich die Debutante dert nid fremd vorkömme.
Stand 2010
Fasnacht Jungi Garde
1937 Dr verlore Schlüssel vom alte Zyghuus
1938 Professor Piccard taucht in die Tiefsee
1939 Film: Füsilier Wipf
1947 Dr Pfuus goht us
1948 D Bolizei bi de Häfelischieler
1949 Dr Flugibaschtler
1950
1951 Kundenfängerei mit Baleen
1952
1953 Dr Profässerhirsch
1954 Wällesittich im Kaffi Sattler
1955 Myshokeykäsperli
1956 SBB Silveschterfahrt
1957 Pfahlbauerbaiz im Joggelibad
1958 Stänzlertschakko (Riehen)
1959 Guetschynfimmel
1960 Ausverkauf im Tessin
1961 Atlantischi Reise
1962 Sp(r)itzensport
1963 JG Kinderstube
1964 Die gmuggti DC-4 (vo Blootze)
1965 S Offiziers-Granz-Schiesse vo Sumpflige
1966 S Zyklope-Drämmli
1967 Was will dr Mobi Digg im Bach ?
1968 D Regrute-Volggshochschuel (vom Sigi Widmer)
1969 Dr Basler Dirgge-Duube-Danz
1970 S Gratiselet
1971 Juhui, Basel het wieder e Clara
1972 Na-na-na und heh-heh-heh – hesch das Gitter au scho gseh ? (Gitter im Stadion)
1973 Mr sueche s alt Basel
1974 Aadie Hitzeferie
1975 Dr laidig Bummel-Rummel
1976 Gsehn er au orange ?
1977 S’Zmorggedringge uf dr Blägg
1978 Uns bisst’s – eych au. D’Luusdante
1979 D Boscht-Spritz-Tour macht s Fifi suur.
1980 10 Johr Circus Basilisk
1981 S Gartezwärgli Festival
1982 Dr Volggsfrosch vo dr Klick-Klack-Bangg.
1983
1984 E Basilisgg brinnelet z’Ziri
1985 Mi gröschte Traum, e Göttibaum
1986 Vision Fasnacht 2036
1987 100 Johr Freiheitsstatue
1988 Bi uns hett’s gfunggt
1989 E halb Johrhundert Eigerrummel
1990 20 Johr Mondspektakel
1991 Landsgmaind in dr Stadt
1992 Bisch au fir Gwalt, jo denn halt
1993 s’Pinsch au
1994 Reclams gsammleti Wärgg, Drämmliregglame
1995 Dr Zoo-(un)logisch Garte
1996 Kischte zügle, neus Untersuechigsgfängnis
1997 Jubelfasnacht
1998 MIR und s’Marsmobil
1999 Bärezunft im Glaibasel
2000 Mir sin dinn, MIR
2001 Big Brother
2002 Jetz sin mir am Zug, was mainsch. Jungi an d’Macht
2003 Spare
2004 Wotsch ain an Botsch du Dotsch
2005 Dr Hans dampft uss alle Löcher
2006 easydupfclub.ch
2007 Numme no Fasnacht mit Pass
2008 Mir sinn jung und primitiv !
2009 Dr Urknall oder s’schwarze Loch
2010 Mir sinn sicher
E baar Sujet hänn nümme könne ermittled wärde, bi Andere isch d’Joorzueteilig unsicher.