logo

Zeedel

Dupf-Club Basel Stammverein

Fasnacht 2020

Eeschtryych Ungäärn – oder ungäärn Eeschtryych

Bedienigsaalaitig
Ych dängg an Böhmermaa und an dr
Recep Erdogan, an dr Esel und an
sälbschtinszenierte Greesewaahn. Ych
hoff, dass dr Fasnachtsnaar das wirkligg
au vrstoot, will d Politik jo mänggmool
sälber unter d Gürtellinie goot. S gitt
allewyl vyyl negativi Sujets an unsrer
Faasnacht, s gitt nyt mee, wo Spass
macht, mer derwääge uff Gras lacht. Miir
ändere das sofort und hänn ab jetzt richtig
vyyl Spass, Miir hänn ganz scheeni
Goschdyym und – richtig krass – e glatts
Sujet, wo in sich gschlosse – daas isch
ironisch – fir so vyyl Schaiss uff dr Wält
stoot und zwoor ikonisch.

Prolog
Oh, Sissi! Du bisch esoo e schaarfi
Sau!
Oh, mii Franzl! Du bisch s jo genau au!
Klatsch mer mit dym Sääbel uff e Arsch,
Achtig! Radetzky! Vorwärts! Maarsch!
Im Takt vo dr Muusig wiege mer mit,
will s in Eeschtryych nyt besser s git.
E Operette, mit vyyl Tüll und Humor,
gsunge vomene katholische Buebechor.
Kafkaesk kaasch Eeschtryych
bschryybe,
e gspässig s Land duet daas immer blyybe.
E „Schmarre“, e „Kaiser“ und au e
Strache
Eeschtryych: Du bringsch uns
grad zem lache!

Mir lache – wäge eire Politiker*inne
Monarche wärde gfyyrt, dr Oschte im Bligg,

Eeschtryych: Du bisch e glunge Biinistigg.
So kuurioos, me muess es aifach gsee ha!
Eeschtryych – e non-fiktivi Telenovela.
Eeschtryych, du läbsch in dr Vergangeheit,
Freiheit isch no das, wo s im Namme treit.
Heimetschutz, ganz vyyl neii Autibaane,
E Politiker mit ere fyyne Wodkafaane.
Nit alles isch schlächt, was vo dir
kunnt.
Aaber scho vyyl – soo dr historisch Befund.
Esoo vyyl Schaiss und ai ganz groosse Furz,
d Regiergskonstellation um e Sebastian Kurz.
Eeschtryych – Dy Politik: E schlächte Witz,
Bruun aagmoolt: Dyni Nationalrootssitz.
Hejoo, au mir hänn vyyl Epfel mit Maade,
aber du hesch aidyttig dr greesser Schaade.
Filz regiert links und Filz regiert rächts,
Politik isch e Farce und gaar nyt Ächts!
Eeschtryych! Jä, du steggsch im Drägg
Korruption für dii e Mittel zem
Zwägg!

Mir lache – wäge eire Monarche
S wird verruggt – das glaubt au kai Schwanz –
S git in Eeschtryych e gääl-schwarzi Allianz,
wo sait, dass d Kreenig vo dr Demokratie,
in allem Ärnscht, d Monarchie muess syy!
Eeschtryych, du hesch jo s Stockholm-Syndrom,
Eiri Habsburger sinn e antiquierts Phantom!
Dr erschti Wäältkrieg? Aigedlig eiri Katharsis,
aaber immer no gseen iir eich als Machtbasis.
dr Strache isch dr Habsburger Sunnekeenig,
wartet uff Alkohol und uff sexuelli Verweenig.
Är wurd jo gärn, s goot in Richtig Nekrophilie,
Sex mit dr Sissi ha. Esoo quasi: dr Franzl syy!
Äär zieht dr Schwanz ii, noch em Skandaal,
Daas isch richtig schaad und sogar fadaal.
Denn zeigt dr Strache doch aigedlig uff,
– mol abgseeh vo siine Phantasie im Suff –
Kaasch au no so saudumm und beschränkt
syy:
In Eeschtryych bisch soo als Vizekanzler derbyy.
Sy hänn scho allewyl e Fierer-Problem kaa,
das het mer au nach dr Monarchie gsee kaa,
Ahschluss und Annektion – s deent äänligg
Aaber daas z vermische isch nur no däämligg.
Wenigschtens – mer muess es no erwääne –
hett s mittlerwyle halt in Ungarn dääne, –
Zem Glügg sin die alte Bündnis grisse –
Wider mee Lyt, wo richtig bruun dien schysse.

Mir lache – wäge eirem Sälbschtbild
Im Sport kaa Eeschtryych gaar nyt rysse,
Ooni „Blue Bull“ wär me gaar vrschisse.
Au bim Ski isch mer nimme oobe derbyy,
S wär richtig nätt, wurd s immer esoo syy.
ORF luege, daas isch aifach wunderbaar,
Dooderbyy wird aim sicher ains grad glaar:
Hesch diggi Eier, aber glych e Kompläggs,
Richtigi Untertitel z setze isch kompläggs.
Dy Sälbschtbild: So heerlig verschoobe,
wyter oobe khasch nur Gott no loobe.
Eeschtryych – s Epizentrum vo Europa,
Ibiza isch do nur e ganz glaine Faux pas.
Groossmachtswahn, Erfinder vom Balkan,
Boulervardismus bidrybsch voll Elaan.
D Gschicht so rych, d Gägewart so trieb,
Eeschtryych, mir hänn dii doch so lieb!

Mir lache – und sinn doch ganz glych
Aigedlig, sinn mir uff dii jo nydisch,
au wenn mer gseen, wie du soo lydisch
duet s uns leid, mir sinn zimlig glych
rot und wyss, sinn baidi sau-rych.
Mir sinn wie Briedere – also so ungfäär –
und – au das fallt mer wirkligg schwäär –
Mir lache, will uns aigedlig glaar isch,
Dass vo uns beidene, du dr Star bisch.
Mir hänn s Heidi und dr Tell, du dr Mozart
Mir hänn s Kottelet, du Schnitzel feyn zart.
Mir hänn beidi Alpe, aaber du mee Käller,
und dyni Exekutyve wäggslet schnäller.
Eeschtryych – mir hänn dii aigedlig gärn,
und Ressentiments ligge ys wirgglig färn.
Aaber, und das isch d Moral vo dr Gschicht
Zur Zyt bisch du jo scho nit ganz esoo dicht.
S bliibt ys – dr Adler wird uff ys aabekrache –
Gar nyt anderes iibrig als iiber dii z lache.

Zum Archiv